Гьаб нухалда «Анжи» бергьана
Турниралъулаб таблицаялъул «рачIалдаго» хутIана
Футболалъул рахъалъ Россиялъул чемпионаталъул 13-абилеб туралда МахIачхъалаялъул «Анжиялъ» Анжи-Аренаялда къабул гьабуна Красноярскалъул «Енисей» команда. Гьелде щвезегIан чанго хIаялда къезеги къун, турниралъул таблицаялъул рачIалда букIана нилъер команда. Гьелде тIадеги, финансазул рахъалъги лъикIаб хIал гьечIо «Анжиялъул». Чанго моцIалъ кьун гьечIо футболистазе харжал. Мигьлъун руго МахIачхъалаялъул командаялъул рахъкколезул кьералги. Гьелъие гIиллалъун дица тола «Анжиялъул» мухъилъ цо гурого Дагъистаналдаса футболист гьечIолъиги. Кин букIаниги, гьединаб хIалалда бугеб командаялъ «Енисеялъулгун» букIараб дандчIваялда мадар гьабуна, ай 2:1 хIисабгун бергьенлъи босана. Хадусеб туралда, ай 9 ноябралда «Анжи» хIазе буго Тулаялъул «Арсенал» командагун.
